BUSCAR POETAS (A LA IZQUIERDA):
[1] POR ORDEN ALFABÉTICO NOMBRE
[2] ARCHIVOS 1ª, 2ª, 3ª, 4ª, 5ª 6ª 7ª 8ª 9ª 10ª 11ª 12ª 13ª 14ª 15ª 16ª 17ª 18ª 19ª 20ª y 21ª BLOQUES
[3] POR PAÍSES (POETAS DE 178 PAÍSES)

SUGERENCIA: Buscar poetas antologados fácilmente:
Escribir en Google: "Nombre del poeta" + Fernando Sabido
Si está antologado, aparecerá en las primeras referencias de Google
________________________________

domingo, 25 de marzo de 2012

6476.- CHECHU GARCÍA




CHECHU GARCÍA. (ASTURIAS, ESPAÑA)
Chechu García ye natural de L'Entregu, Samartín del Rei Aurelio, onde naciera nel añu 1970.
Llicenciáu en Bioloxía pola Universidá d'Uviéu. Entama na lliteratura de la mano del grupu L'arbixil del "Institutu Virxe de Cuadonga" de L'Entregu, colos qu'escribe a comuña'l conxuntu de cuentos “Guaños d'anguañu”. Como autor dase a conocer col llibru infantil “Vieyu Trasgu”, qu'ameritó'l primer premiu del Concursu “Llectures pa rapazos” 1996 de L'Academia de la Llingua Asturiana. Al añu viniente algama'l premiu "Teodoro Cuesta" de poesía col llibru escritu en collaboración con Martín López-Vega “Les coraes de la roca” que se publica tres años más tarde.
Como dramaturgu consiguió'l Premiu de Teatru de la Academia de la Llingua Asturiana cola obra Gasolina con capuyos, fecha en collaboración con Roberto Corte, y que nel añu 2002 diba estrenase nel teatru Xovellanos de Xixón por Barataria Teatru; la obra recibe numberosos galardones, ente otros, al meyor autor teatral asturianu.Nel añu 2002, ye la gran triunfadora de los premios teatrales asturianos na gala que se cellebra na Felguera, y ye finalista de los premios Max na categoria “espectáculu revelación”.
A últimos del 2003 asoleya'l poemariu Teseles, mosaicu de poemes que representa la vida d'un home qu'observa, reflexona y canta a la vida. Ta dividíu en cinco partes. Nos años siguientes los cuentos infantiles “Marta y el peludín de Carrandi”, “Marta y el muséu Xurásicu” y "Marta nun quier cortar el pelo", asina como les pieces teatrales “La pitonisa”, “Cuatro verdaes”, "Otres cuatro verdaes", "Kaos", “un compromisu maxinariu” y l’antoloxía teatral “l'album de Talía”.
Amás, foi articulista del selmanariu “Les Noticies”, ye autor de dellos cuentos y guiones de cómics. Los sos poemes figuren en delles antoloxíes como “Fruta del tiempu”, “Los cien meyores poemes en llingua asturiana” o “Palabres clares”. Tien publicao en numberoses revistes: Reloj de arena, Sietestrellu, zimbru, la ratonera, lletres asturianes, lliteratura.... Ye ún de los fundadores nel añu 1998 de la tertulia lliteraria “Tom Malory”, de la que sigue formando parte. Ye coordinador de la revista lliteraria Reciella Malory.
Anguañu, ye coordinador y guionista del programa radiofónicu “Nomes d’Asturies” de la RTPA.






Escombrera


Trabayen na escombrera
manos
de muyer.
Miren a la cámara
enllenes de Norte y fame.
Son carboneres.
Pantasmes d’un mundu
que nun-yos pertenez.
Escures sombres
nuna tierra estraño.


Perdíes,
ensin campanes
qu’esconxuren
el nuberu y la derrota.










Ulises


El vieyu héroe
sienta nuna roca xunto al mar.
El cielu, coloráu,
ye’l cielu de bronce de los poemes d’Homeru.
La sable rellumante, la de milenta versos.


Les manes que mandaron nel timón d’arguyoses proes
apigacen cansines nel cayáu.
Son pelleya de güesu, los brazos de fierro
que ficieran cantar cimblante l’arcu.


Nes playes d’Ítaca,
los güeyos que nunca erraren blancu
nortien l’horizonte sedientos de señaldá.


Pente les nubes que texen
y destexen l’alcordanza,
los dulces llabios de Circe
vencen al tiempu.








Chopu


Solitariu
enzarráu nun cuerpu d’espacios
posa’l chopu de tantes tardes.


Parez eternu
coronáu pol sol de primavera.
En paz. Ayenu al mundu.
Completu.


Y ensin embargu
na picolina
amústien-y les primeres fueyes
arrástrense los gritos
día y nueche, ensin parar.


Qué xabaz llucha de silencios.
Con calma infinito
la yedra va envolviendo-y el troncu.
Afogándolu.
Con invisible enfotu
van los arfueyos
envenenando-y la semiente.


Qué mansu dolor.


Tamién el tiempu
na increíble inmovilidá
de la tarde,
ta consumiendo
al vieyu chopu.







No hay comentarios: