BUSCAR POETAS (A LA IZQUIERDA):
[1] POR ORDEN ALFABÉTICO NOMBRE
[2] ARCHIVOS 1ª, 2ª, 3ª, 4ª, 5ª 6ª 7ª 8ª 9ª 10ª 11ª 12ª 13ª 14ª 15ª 16ª 17ª 18ª 19ª 20ª y 21ª BLOQUES
[3] POR PAÍSES (POETAS DE 178 PAÍSES)

SUGERENCIA: Buscar poetas antologados fácilmente:
Escribir en Google: "Nombre del poeta" + Fernando Sabido
Si está antologado, aparecerá en las primeras referencias de Google
________________________________

domingo, 25 de marzo de 2012

6478.- ELÍAS VEIGA


Elías Veiga (Presnes, Ayande, ASTURIAS 1972) ye encargáu del Archivu Municipal de Tinéu y de la Casa la Cultura de Navelgas. Publicó'l primer poemariu nel 2004, La tierra fonda (Trabe), al que siguió cuatro años depués Robinson astur (Universos), obra que ganó'l Premiu de la Crítica de l’Asociación d’Escritores d’Asturies. Nel 2011 ganó la VIII edición del Concursu de Cuentos Curtios d’Adultos de Cangas del Narcea col rellatu «Tierra adientro».
El poeta ayandés Elías Veiga acaba de ganar el Premiu Teodoro Cuesta de Poesía, qu'anguaño cumplía les 21 ediciones. El xuráu, reuníu na Casa la Cultura de Mieres la tarde del llunes 19 d’avientu, decidió conceder por unanimidá’l premiu de 4.000 euros al poemariu tituláu Testamentu, d'Elías Veiga.
Elías Veiga tien espublizao La tierra fonda (2004) y Robinson astur (2008).







Foto de merienda


Foi quiciabes un día santu, igual un domingu
pela tarde acabantes de xintar, primavera
casi veranu, toos sorrientes ellí sentaos
tan mociquinos sobre’l mantu de la yerba
y tu, ma, tan guapa como siempre,
la chaqueta encima’l llombu
anque fríu nun ficiere y papa con munchu pelu…
vaya pintes y toa aquella xente alredor,
esti, Pepín Hevia, aquel, Balbino Santos, Alfonso Llano
que ya morrió, cestes de comida y botelles de vinu asgaya,
los homes fumando, muncha comedia y allegría,
esta, Pilar, que casó con Miguel, Elvira
per arriba Adela y Damián, Antón soltando
dalguna de les suyes en mediu de tanta xarana;
faciendo la foto, misteriosa muyer, Pepa Miranda,
y al fondo un perru curiosu –naide s’alcuerda
de la so presencia-, esperando quiciabes
que dalguién-y tirase al aire
un güesu de felicidá inda caliente.










Nueche


Quédase la nueche sola,
llibre,
desnuda,
nel silenciu enceso de los astros
que van resucitando aduces
como un enxame d’imperios prodixosos.
La ciudá
y los pueblos
y los caminos de la “tierra entero”
-los caminos que llabren la historia-
abellúguense baxo les ales
y les lleendes máxiques
del so vientre hospitalariu.
Les coses tán callaes y acompáñenme.
Siéntome estrañu equí, agora, nesti llugar,
nesta otra nueche na qu’esnalo
como un barcu al debalu
sobre les foles del diluviu.
Nella atopo un vacíu espaciu ensin memoria
llen de señaldá
y solombres con más solombres
esguilando furtives,
venenoses, firiendo
cada esquiniellu de la mio alma reveyida.








La ciudá


A Jorge y Asier


Equí nun canten los gallos
nin baxen los llobos al ríu,
sedientos, medievales, de madrugada
a llamber la lluna,
a violar el silenciu encesu de la viesca.
Nun hai xanes peles fontes
y les sirenes vuelven a casa
borraches y alloriaes.
Nengún Nuberu,
tolo más dalgún mendigu ensin patria
que bebe muncho,
come poco
y mexa nubes peles faroles.
Hai, sí, almes en pena
pero nun ye la Güestia, non,
son toa esa xente cargao d’hipoteques
y creitos a cortu y llargu plazu,
que pesen como cadenes colgaes del corazón.
Nun hai árboles pa nun ver la viesca,
dexen cuatro
nesos parques con agua podre
y palombes canceroses.
Si quies respirar aire puru
o ver les estrelles,
garra un tren
o’l primer coche de llinia
que te lleve bien lloñe
hacia otres tierres ensin llendes d’hormigón.
Y si puedes, nun vuelvas más,
quédate nalgún llugar
con menos xente
y más persones.










Pueblu


Las nubes.
El ríu. Heráclito’l madreñeiru.
La Ponte’l mulín.
Las truitas.
El monte Xexán.
La ilesia Zalón
San L.l.uís.
El norte baxando por Pruyeda.
La primeira l.l.uz de la mañana.
La Casona debaxo la figar.
La cama onde you nací. L’instante.
Bulita atizando’l fou de la l.l.ariega.
El.l.a sola sentada, esperando.
El pan recién feito.
La curuxa nel teixu.
La fonte’l Payarón.
(Esta nueite pasada
Baxanon los l.l.obos ya
Matanon el perru de Veiga)
La nieve en Cazarnoso.
El maíz na panera.
Las vacas na corte.
El foucín de bulito.
La bruesa nel l.l.eñeiru.
. . .
El golor de la tierra.





No hay comentarios: